Назва калектыву “Куляшоўскія сяброўкі” наўпрост апісвае сутнасць гэтага гурта. Спяваюць тут жанчыны, якія сябруюць ужо шмат гадоў, а нехта – нават з самага дзяцінства.
Рэпертуар, як кажуць жанчыны, у іх “даўнейшы”. Песні яны спяваюць народныя, якія шмат пакаленняў перадаваліся ад продкаў нашчадкам. Тэматыка твораў розная: вясёлыя і сумныя, пра каханне і пра разлуку, нязменна адно – імпэт у вачах сябровак.
Запалу і імпэту “Куляшоўскіх сябровак” можа пазайздросціць любы сучасны музычны гурт. Сапраўдная музыка ідзе ад сэрца і таму заўсёды трапляе ў душу слухача. Гэта ж можна сказаць і пра куляшоўскі ансамбль. Шчырыя спевы і любоў таленавітых жанчын да сваёй справы робяць песні ў іх выкананні важным нематэрыяльным багаццем нашага краю.
